الاستغماية

قالت بتهجم انتم من خربتم البلد بثورتكم انت وكل رفاقك الثوار .

هما فين دلوقتى يشوفوا البلد بعد ما خربت .كل واحد راح فى طريق انتهازيتة ومصالحه وسيبتم البلد بتغرق  ودلوقتى بتغسلوا ايديكم من كل اللى بيحصل الأن .

الدنيا كلها بقت غلا والأسعار راكبها ميت عفريت كل يوم وتيجى تكلم حد يقولك الدولار يا مدام .والدولة نايمة ومش هنا سيبانا فى المطحنة تفرم فينا .احنا الغلابة .على العموم لنا رب اسمة الكريم هيخلص فى يوم من الكل .بس ياريت متقوليش ثورة تانى خالص كفاية اللى حصل من ثورتكم الشؤم دى واللى هيجيب لى سيرة 25 يناير ولا حتى ثورة 19 هقتلة .

انت ساكت لية سايبنى أكل فى نفسى وخلاص .مش مصدقنى انزل شوف الناس بتكلم بعضيها .

انزل بص فى وشوش الناس فى الشارع ولا فى المواصلات ولا فى السوق وكأنهم بيبصوا للبضاعه وبترحموا عليها اودام عينيهم ومش قادرين يقربوا منها .

تصدق احيانا فى الميكروباص او فى المترو تلاقى صمت ووجوم فى وشوش الناس وبمجرد ما تفتح بس موضوع تلاقى الناس اتفتحت وكأنهم كانوا على شفا الإنفجار الكل يسب للحكومة وللكل مش عارفين يعملوا اية .

انا ليا واحدة زميلتى قربت تتجن مرتبها مش بيكفى الدروس الخصوصية لأولادها ومطلوب منها توفر أكل وشرب ومصاريف وموصلات و سكن وكهرباء وغاز ولبس وبتشد الحزام لما الحزام اتقطع بقت بتتمنى الموت عن حياة العذاب اللى هى فيها .عملت لها اية الثورات بتاعتكم عملت لها اية .

قلتم عيش وحرية وكرامة ولا لقينا عيش ولا فية حرية ولا حتى كرامة الكل بينداس والكل بيطحن فى الكل مفرمة الكل دخلها وبتقلب فيهم زى ما هى عايزة .

زمان الله على زمان وأيام زمان كان فية اخلاق واحترام وتواضع وشغل وانتاج ومصانع شغالة وعمال بتنتج .دلوقتى لا فية سياحة ولا شغل والبطالة زادت والمصانع وقفت ماكيناتها لية قولى لية هى دى الثورة اللى هتغيير البلد .

هو لية يارب ملناش حظ شلنا مبارك وقلنا الخير جاى ولكن للأسف اعتصامات ومظاهرات اسبوعية وفوضى فى كل مكان ومفيش أمن ولا أمان استحملنا وقلنا اللى جاى احسن اكيد المجلس العسكرى وقلنا وهتفنا يسقط حكم العسكر بعد ما كان الجيش والشعب ايد واحدة بقدرة قادر أصبح يسقط يسقط حكم العسكر .

ودارت الأيام ومشى المجلس العسكر وجة الرئيس المدنى قلنا نصلى ركعتين شكر لربنا هو دا اللى كنتم عايزينة رئيس مدنى جالكم المدنى والإخوانى كمان بمرشدة وجماعتة طلع ألعن من اللى قبلة قلتوا ثورة تانى تصحح الإختيار السىء .قال هو شرعية شرعية دونها الدماء وكل طرف ركب راسة قلتم الجيش والشعب ايد واحدة تانى وتالت ومن ساعتها واحنا فى مفرمة اصعب من اللى قبلها المرادى مفرمة بجد .شلتم المدنى بمرشدة بجماعتة والخناقة شغالة موت وارهاب كل يوم والحالة من سىء لأسوء .

قلتم دستور جديد بدل دستور المرشد. ورئيس منتخب جديد تانى ومعاه منافس ثورى بيعبر عن الثورة.وخسرت الثورة وظهرت على حقيقتها امام البدلة العسكرية .

خلع البدلة وجلنا الرئيس المنتخب قال برنامجى دة سر علشان اهل الشر قلنا خير ان شاء الله احنا معاك بقلوبنا وروحنا نحمى الوطن من الإرهاب وخد تفويض كمان وكمان ثورة تانية .

قال حنحفر قناة جديدة قلنا من جيوبنا نمولها واحنا معاك المهم الخير يجرى فى الأرض الطيبة .قال اطمنوا بكرة المليارات هتجرى فى فى الأرض الطيبة تعمرها هنعمل لكم مؤتمر اقتصادى وندعى العالم كلة يجى عندنا والبطالة تنعدم والدخل يزيد والأسعار تقل والانتاج يتوفر من كل احتيجاتنا قلنا احنا معاك ووراك ياريس .ومن مؤتمر لمؤتمر ومن وعود لوعود ولكن للاسف احنا مش حاسيين بحاجة ملموسة صحيح فية شبكة طرق رائعه وفية اسكان اجتماعى وعاصمة ادارية جديدة وألاف الأفدنة بيتم زراعتها ومحطات كهرباء وطاقة بس ياريس احنا فين من كل دة لا شفنا مليارات المؤتمر الاقتصادى ولا البطالة قلت بل زادت والاسعار ولعت بعد تحرير سعر الصرف والدولار بقى مجنون .والارهاب كل يوم بيموت فى واخوتنا واهلينا فين قلى ياريس انت سامعنىى  ازاى هتبقى قد الدنيا وانا مصدقك ومعاك لاخر لحظة وثانية لكن ارجوك عايز اسعار كويسة معقولة عايز اعيش والناس تعيش وتحس بالأمان وبعد كدة اعمل كل اللى انت عايزة حقق كل احلامك اعمل طرق كبارى وعاصمة اداريةو عاصمة عالمية كل اللى انت عايزة بس الأول نعيش هو دة شىء صعب بعد كل الدم اللى سال والثورات اللى حصلت ولا هنفضل كدة فى فى لعبة الاستغماية .