يوم التلات اللى جاى ؟
ومالة يوم التلات اللى جاى
اصلة يوم دسم وفية حاجات كتير دة يوم 19 نوفمبر ودة فى
ذاكرتى هو ذكرى محمد محمود تصدق انى لسة شامم ريحة الغاز وفاكر لما صديقى محمد من
6 ابريل يقولى انا رايح اخد غطس وارج وصديقى د خالد وهو يجول بكاميرتة ليرصد كل
حدث على مدار الايام المتوالية لبداية نشوب الاحداث واحنا اترمينا بالليل من كتر
التعب على الارض فى وسط الميدان واحنا فى حالة اعياء كاملة وكل مانشوف العنف
المفرط ونتذكر زمايلنا وهما بيتجرو الى الزبالة وكانهم لا ينتمون الى عالم
الانسانية
واحداث محمد محمود هى الاحداث التى تعيش فى ذاكرتى لانى
تعرضت فيها للسحل والضرب ومن كتر الضرب شالونى على المستشفى الميدانى ومنها للخيمة
اتحطيت فيها مش قادر اتحرك وعايز اروح لان هدومى اتبهدلت من السحل وجسمى من الضرب
خلص
اسكت ياعم متفكرنيش علشان انا بحس بالتقصير فى حقهم كل
اللى استشهدوا كانوا معانا جنبنا كان ممكن يكون انا او انت لكن لم نل شرف هذا
الاستشهاد وحلفنا باروحنا لنجيب حقهم ولكن للاسف حتى اليوم مجاش حق اى حد قدم نفسة
وروحة ودمة علشان حريتنا وكرامتنا
تصدق بالله كان فية واحد جنبى فجاة خد طلقة فى كتفة ووقع
جنبنا واحنا من الصدمة جالنا حالة هيستيريا شيلناة بسرعه على جامع عمر مكرم والدم
مالى هدومنا وارضية الميدان سودا من كتر طلقات الغاز ولا الاختراع اللى اخترعة
فؤاد وعمل واقى صدرى علشان الخرطوش ويلبس قناعه الواقعى قناع بجد مش كمامة زى
حالتنا ويدخل للصفوف الامامية علشان يجيب مصابيين ويساعدهم ويجى ياخد نفسة بعد كل
جولة ويقوم بسرعه يقول انا رايح اشم غاز يا جماعه وراجع وانا اقولة تصدق انا كان
عندى برد الغاز دة نضف صدرى من اللى فية كانت روح الحب والوفاء تملأ الجميع الكل
عندة استعداد ان يحمى من يعرف ومن لايعرف بروحة فداء لة انه الانتماء لعيش حرية
كرامة انسانية
قلتى بقى يوم التلات الجاى فية اية
يا عم دة عيد ميلاد السيسى
طب وانا مالى يعنى السيسى جة احتفل بعيد ميلادى ولا حتى
قالى كل سنة وانت طيب يا ابوعلاء وعقبال خمسين سنة
بس دة السيسى اللى بيحارب الارهاب واللى انقذ البلد من
الاخوان واللى واللى
دانت ناقص تغنيلى تسلم الايادى
ماهو دة برضة السيسى عضو المجلس اللى اقتلنا وسحلنا
وضربنا بدون رحمة ولا مرعاة للانسانية
خلاص ياعم متوديناش فى داهية على العموك كمل جميلك
وحملات ترشيح السيسى رئيس ومحبى السيسى هينزلوا يحتفلوا بعيد ميلادة ويعملوا تابين
لشهداء محمد محمود
ودة اسمة اية ان شاء الله كانوا معانا كتف بكتف مثلا فى
محمد محمود شموا الغاز جربوا الخرطوش شافوا اللى شفناة
خلاص ياعم كدة كدة الاخوان هينزلوا هما كمان وعامليين
دعوات للنزول علشان الشهداء وان حقهم مجاش وان قادة الانقلاب هم القتلة وان مرسى
لما يرجع هيطهر القضاء والاعلام ويحاكم كل القتلة
بص ياعم متجبليش سيرة الجماعه الهباب دى انا اصلا قرفان
منهم وبحس بمغص فى معدتى لما بسمع اسمهم
لية بس ماهم نفسهم يكسبوا طعاتف الناس وبدل مايقولوا
مرسى هيقولوا شهداء وانقلاب
بص ياعم احنا كنا بنتسحل وبننقتل وهما بيظبطوا مع القتلة
ويقولوا علينا بلطجية ويجب ان يتم التعامل معهم باقصى عنف وبيخططوا للانتخابات دول
عالم لمؤاخذة انا بقى اللى هينزل منهم هروح امرمط بكرامة اهلة الارض احنا سيبينهم
عايشين فى الوهم ومرسى راجع والكلام الفارغ اللى عايشين فية دة تيجى لحد محمد
محمود يكتموا خالص
اصلا انا مش رايح الشغل يوم 19 وهقعد فى البيت اتفرج على
الماتش اللى هنوصل بية كاس العالم وهنغلب غانا 6 صفر قول يارب وبعدين نطلع نغنى
تسلم الايادى بعد الماتش ونقول كان يوم ميلاد السيسى خير وزى ما خلصنا من الأخوان
كمان ودانا كاس العالم
طب لو اتغلبنا هنا كمان هيقولوا اية
اوبا دى هتبقى مصيبة هيقولك يومة كان نحس وخسرنا الماتش
بس اسكت احنا مروحناش كاس العالم بس هو جالنا لحد عندنا
شفت سيادة الرئيس وهو حضنة فى صدرة وبيقولة احبيبى يا كاس العالم دى بردة تحسب للسيسى اللى بعت 6 وزراء يستقبلوة
بس للامانة مجىء كاس العالم لمصر خبطة كبيرة دة بيقول
للعالم مصر بخير وبامان والحكومة شاطرة استغلت الحدث صح والاعلام قام بدور كويس
بردة السيسى مان ومان قوى
انا ياعم هروح الشغل يوم 19 ولا هخاف من الاخوان ولا كمل
جميلك ولا اى حد وكل كلام الاخوان والحشد اللى واجعين دمغنا بية وان مرسى راجع وان
الشرعية ستحكم والانقلاب هيتحاكم دى عام عالم بق وهيبقى يوم زى كل الأيام وان بعض
القوى الثورة اللى هتروح محمد محمود دى غلطانة احنا مش عايزين صدام احنا هنروح
قبلها بيوم الى ميدان عابدين نحتفل بتأبين كل شهدائنا ومش عايزين شهداء جديدة وان
شاء الله ميحصلش صدام ويعدى زى كل يوم بدون نقطة دم
على العموم ربنا يسهل والمجد للشهداء
ليست هناك تعليقات:
إرسال تعليق