هلوسة مواطن

هلوسة مواطن

قابلتة فى الميكروباص المتجهه من التحرير الى فيصل وكان يبدو علية الارهاق وضيق الصدر لكل من يناقشة فى شىء

فقلت لة صلى على النبى يا عم الحاج واهدأ كدة الزبون على حق

فقال والمواطن هياخد حقة فى البلد دى امتى

أنا ابصحى من النوم فى السادسة صباحا اذهب الى عملى فى م نصر وانت عارف بقى المواصلات والتأخير عن العمل وانا بعمل فى مصلحة حكومية للجمهور يعنى صداع طول اليوم وبعد انتهاء العمل اركب العربية من الرابعه عصرا لحد ما اجرش العربية وانا متعلق فى الساقية دى طول النهار وكل يوم

ربنا يديك الصحه يا حاج

هى فين الصحة والعمر راح فى الجرى ورا لقمة العيش وابن الكلب مش حاسس انا بعمل علشانة اية يقوم يتطاول على امة وعليا طول الوقت عايز عايز دون مرعاة للظروف الهباب اللى احنا فيها ومستحمل واقول بكرة يخلص الجامعه ويشتغل ويساعدنى استكمل تعليم اخواتة

ان شاء الله ربنا يهدية انت عارف الشباب وثورتهم

وكأنى شتمتة لما قلتلة ثورة

ثورة هباب متنيلة بستين نيلة فرحنا وقلنا عيش وحرية وكرامة ولا شفنا لا ابيض ولا اسود لا لا شفنا ايام سودة 3 سنين عجاف وقحط كل شىء بقى بالمقلوب وكل حاجة فلت عيارهالا أمن ولا أمان والمتنيلين بتوع الأخوان وقفوا حالنا ومعتش بشتغل الجمعه من مظاهراتهم وكأنهم هيصلحوا الكون مع انى لا سيسى ولا مرسى كل اللى كنت بحلم بيه حياة هادية وعيشة كريمة ومرتب كويس يرحمنى من عذاب المنهدة من الركاب ويخلينى اقعد مع ولادى زى البنى ادميين استمتع بحياتى لكن أظاهر احنا أتخلقنا علشان الشقى وشكلنا هنفضل فى الساقية دى كتير

تصدق باللة يا بية انا كل يوم فى الميكروباص لازم يبقى فية100 مشكلة الناس كلها بتتكلم فى السياسة وبتنهى الحوار بخناقة وشتيمة وممكن يمسكوا فى بعض دة يقولك فين الشرعية ودة يقوله كانت سنة هباب ياارهابيين يا قتلة

فاضل بس اعمل يافطة واعلقها فى العربية اللى هيكلم فى السياسة راح ينزل

وشاركنا رجلا خمسينى فى الحديث وقال يا اسطى البلد دى عايزة فرعون يحكم بالحديد والنار واللى يجيب سيرة الديمقراطية دة يسجنوة بلا قرف العيال بتتحكم فينا تقولنا يسقط حكم العسكر اللى حامينا وبيصرف علينا واللى انقذ البلد من الجهلة بتوع الأخوان

وقلت يااستاذ مشكلتنا اكبر مما تتخيل

وقاطعنى احنا عندنا مشكلة واحدة ان الجيش والشرطة يلموا الناس دى ليسيبونا نلمهم

دكدة هنبقى فى حرب اهلية

السواق انا مش ناقصكم يا جماعه عليا الطلاق اللى هيتكلم فى السياسة لنزلة من العربية واللى هيقولى ثورة هيكون الكوريك فى دماغة

احنا عايزين نعيش فى هدوء هو دة شىء صعب وكل واحد يشتغل ويتمم دورة المطلوب منة فى مجالة وفى مكانة بضمير واحنا هنبقى حاجة كويسة كل واحد يبدأ بنفسة ومش عايزين كلام تانى  

أنا .......على جنب يا أسطى